“aspaldikotik” emanaldi berria

FITXA ARTISTIKOA

”aspaldikotik” Juan Kruz Igerabidek OINKARI dantza taldeari espresuki prestatu dion gidoi batean oinarritua dago. Emanaldian zehar itxuraldatzen den sorgin baten amodio istorioa kontatzen zaigu. Hitzak eta dantzak uztartzeko garaian, Iñaki Beraetxe aktore ezaguna arduratuko da ipuinari ahotsa jartzeaz.

... eta zergatik “aspaldikotik”?... izango da askoren galdera. Alde batetik, istorioak berak oso atzera jotzen du, gure protagonista den sorgina aspaldiko garai batean lokartu ondoren gaur egunean esnatzen baita. Beste aldetik, sorginak abentura berri honetan topatuko dituen dantzen oinarria tradizioarekin uztartzen da, gure aspaldiko tradizioarekin. Ondorioz bi kasuetan iraganeko puntu batetik gaur egungo puntu batera egiten dugu bidaia, aspaldiko garai batetik gaur egungo garaiera, aspaldikotik gaur egunera.

Dantza emanaldiak iraungo duen 90 minututan zehar, OINKARIren azken urteetako ildoa jarraituz, dantza tradizionalak Edu Muruamendiarazek prestaturiko koreografiekin tartekatuko ditugu.  Zuzeneko musika berriz, Xanet Arozenaren zuzendaritzapean arituko diren 8 musikarien esku geratuko da. Taula gainean ez dira faltako txistua, xirula, kitarra, baxua, bateria, perkusioa, eskusoinua, ahotsa, bibolina, ahosoinua eta zeharkako flauta bezalako instrumentuak.

Emanaldi honen beste berrikuntzetako bat argi eta soinu efektuak izango dira. Arlo hauetan ahalegin berezia egin du taldeak emanaldia misteriozko giro berezi batean kokatzeko asmoz. Hau dela eta, “aspaldikotik” emanaldi berria gaueko ikuskizun bezala definitu dugu, bestela ez baitago argien efektuez gozatzeko aukerarik.

Soinua eta ahotsari dagokionez berriz, dantza eta dantza artean kontatuko zaigun istorioa ahots goxo bezain sarkor baten ildotik etorriko zaigu, Iñaki Beraetxeren ahots ezagunetik alegia. Emanaldia zein hizkuntzatan gozatu nahi duzun ere aukeran jartzen dizugu: Euskara, gaztelera, galiziera eta katalana. Tokian tokiko hizkuntza bultzatzea helburu dugun arren, garrantzitsuena ikusleak dantzez gozatzea eta hauek ulertu ahal izatea dela deritzogu.

Emanaldiaren inguruan edozein zalantza izanez gero, gurekin kontaktuan jartzea besterik ez duzu, gustu handiz argituko dizkizugu zure galdera edo eskaerak. 

aspaldikotik promo bideoa ikusi

Hona hemen OINKARI dantza taldeak hitzemanda dituen emanaldien agenda: